बंदुकीचा धाक दाखवत बोईसर मध्ये दरोडा,भरदिवसा मोठ्या वर्दळीचा परिसरातून लाखोंचा ऐवज लंपास करीत केले पोलिसांना आवाहन
ज्ञानेश्वर रामोशी
बोईसर :- येथील मोठ्या वर्दळीचा परिसर असलेल्या ओस्तवाल एम्पायर मधील एका राजश्री इंटरप्राइजेस या खाजगी कार्यालयात शुक्रवारी दुपारी ३:१५ वाजेच्या सुमारास पाच जणांनी सशस्त्र दरोडा टाकून लाखो रुपयांच्या ऐवज लुटत पोलिसांना आवाहन केले आहे.
दरोडेखोरांनी या कार्यालयातील कर्मचाऱ्यांना बंदूक आणि चाकू दाखवून रोख रक्कम आणि अंगावरील सोन्याचे दागिने लुटून पोबारा केला आहे.दिवसाढवळ्या पडलेल्या या दरोड्यामुळे बोईसर शहरात खळबळ उडाली आहे. बोईसर येथील ओस्तवाल एम्पायर परिसर हा सर्वात जास्त वर्दळीचा आणि गजबजलेला भाग आहे. अशा परिसरात दिवसाढवळ्या दरोड्या सारखी घटना घडवली म्हणजेच दरोडेखोरांनी थेट पोलिसांनाच आव्हान दिले आहे.
ओस्तवाल एम्पायर येथील रिषभ अपार्टमेंट मधील राजश्री इंटरप्राईजेस या खाजगी कार्यालयावर दुपारी पाच दरोडेखोरांनी दरोडा टाकला. यावेळी कार्यालयातील एक महिला आणि तीन तरुण यांना दरोडेखोरांनी बंदूक आणि चाकूचा धाक दाखवत त्यांना दोरांनी खुर्चीला बांधून कार्यालयातील साडेचार लाख रुपयांचे रोख रक्कम तसेच महिलेच्या गळ्यातील सोन्याचे मंगळसूत्र व तरुणांच्या गळ्यातील सोन्याची चेन लुटली. त्याच वेळी कार्यालयात चहा घेऊन आलेल्या व्यक्तीच्या हातातील अंगठी सुद्धा त्यांनी काढून घेत पसार झाले.
दोराने हात बांधून ठेवलेल्या एका तरुणाने कशीबशी आपली सुटका करून घेऊन मालकाला फोनवर घडलेली घटना सांगितली. दरोड्याची माहिती मिळतात पोलीस घटनास्थळी पोहचले. आणि दरोड्याचा तपास सुरू केला. पालघर चे पोलीस अधीक्षक श्री बाळासाहेब पाटील अप्पर पोलीस अधीक्षक श्री पंकज शिरसाठ आणि उपअधीक्षक (गृह ) श्री. शैलेश काळे यांनी घटनास्थळी भेट देत पोलीस निरीक्षक प्रदीप कसबे सहाय्यक पोलीस निरीक्षक सुरेश साळुंखे, गजानन पडळकर यांना तपासाबाबत सूचना दिल्या. दरोडेखोरांचा लवकरच तपास लावत जेरबंद करण्यात येईल असे पोलिसांनी सांगितले आहे.
