आंध्र प्रदेशात भीषण अपघात; खासगी बस दरीत कोसळून 10 जणांचा मृत्यू, 23 प्रवासी जखमी
आंध्र प्रदेशातील अल्लूरी सीताराम राजू जिल्ह्यात शुक्रवारी (12 डिसेंबर) पहाटे एक गंभीर अपघात घडला. चित्तूर जिल्ह्यातील प्रवाशांना घेऊन निघालेली खासगी बस मरेडुमिल्ली घाटातून जात असताना सुमारे 5.30 वाजता खोल दरीत कोसळली. या भीषण दुर्घटनेत 10 प्रवाशांचा जागीच मृत्यू झाला असून 23 जण जखमी झाले आहेत. बसमध्ये एकूण 37 लोक होते—35 प्रवासी, चालक व क्लीनर.
अपघातानंतर काही क्षणातच स्थानिक गावकरी धावून आले आणि बचावकार्य सुरू केले. माहिती मिळताच चिंतूर पोलीस, रुग्णवाहिका आणि बचाव पथके घटनास्थळी दाखल झाली. बसचा काही भाग कापून अडकलेल्या प्रवाशांना बाहेर काढण्यात आले.
जखमींना प्रथम उपचारांसाठी 15 किलोमीटर अंतरावर असलेल्या सीएचसी चिंतूर रुग्णालयात दाखल करण्यात आले. त्यांची प्रकृती स्थिर झाल्यानंतर त्यांना पुढील उपचारासाठी भद्राचलम येथील रुग्णालयात हलविण्यात येणार असल्याची माहिती प्रशासनाने दिली आहे.
दरम्यान, चिंतूरचे उपजिल्हाधिकारीही घटनास्थळी पोहोचले असून बचाव व मदतकार्यावर सतत लक्ष ठेवत आहेत. दुर्घटनेमुळे परिसरात हळहळ व्यक्त होत आहे.
